الاختيار بدون بطاقة انتخابية
طبعا حضرتك عارف ان انا وانت والمخبر تالتنا والامين رابعنا , ويا رايحين الغوريه خدوا بالكلم من الكامين ونحن فى بلد اللى بناها كان حلوانى لذلك السكر فيها غالى , ويحرر فيها المخبر محضر سواقة توك توك بدون رخصة وظابط المرور محضر بيع برة التسعيرة
وعلى الرغم من ذلك وجدت المنظمات الدولية اوجه تشابة بين دول العالم الاول ودول حوض النيل
فالاولى يمكن ان تستوقف فيها رئيس الوزراء لتحرر له مخالفه مرورية بينما الثانية يمكن ان تستوقف رئيس الوزراء لـ "تحب" على ايده وتقولة يسامحك لان حظك العثر بين قوسين منيل نزلك من البيت فى الوقت الى سعادتة معدى من على الكوبرى بس ام العيال هى السبب مصممه على خراب البيت لو مرجعتش برغفين عيش وحضرتة طبعا عارف ان الدول بدون انهار الماء فيها وزنة دهب وبلاد فيها فساد العيش فيها وزنة نص كيلوا فى وجود مفتش التموين وربع جرام فى وجود مفتش التموين وهو معبى وشايل من كل شكل ولون
والكبارى فى مصر مش معمولة كدة اى كلام لا ده تصميم دقيق لكيفية التخلص من العمالة الزائدة والشيوخ و النساء والرضع والاجنة المتراكمة وعند فشل التصميمات قرروا فتح البلاعات واللى يقع فى بلاعة يتعمل مكانها ميدان ويتسمى باسمه وبعد الاربعين يتشطب اسمة من على الميدان ويبقى الميدان على اسم حرم اخو مرات ست اى مسئول
وفى افتتاح الميدان توزع التهانى والهدايا والعربيات المرسيدس بالرشاوى بتاعتها وعدد واحد جواز صفر وتاشيرة للندان لزوم السلكان وبعد فترة يعود الهاروبون ويستقبلوا استقبال الفاتحون بعد ان خلصوا النهبايه وجاين ياخدوا دفعة تانيه
لذلك نويت والنية لله انى ساقوم بنهب كيس شبسى من ام فتحى البقالة اللى جنب البيت واختار طعمة بمزاجى ومنغير بطاقة انتخابية ولا اظهار رقم قومى وبدون سحل على باب اللجنة
والسلام ختام .... وقولوا لام فتحى متزعلش هبقى اختار لها طعم الفول بالزيت الحار ومن على وش القدرة
بلد لا قيمة للعمل فيها غير هتاخد كام
ردحذفبلد الناس فيها بقت بتقول على الحرام حلال علشان بيجيب فلوس
بلد كل واحد فيها بقى مفتي في اللي يعرفة و اللي ميعرفوش
بلد فيها النصاب و الحرامي هو الجدع و المحترم هو الاهبل و الغشيم بقى فتوة و الرحيم يضرب بالنار
بلد حتى اللي فيها عايز يعارض يعارض الصبح و يحتج في مظاهرة واخر النهار يشرب حشيش
بلد المثقفين فيها علشان يتسقفلهم لازم يكونوا ملحدين و يكفروا بالله على اختلاف الاديان
بلد فهمت الحرية غلط فهمت العمل غلط فهمت الثقافه غلط فهمت العدل غلط و بقى اللمبي و سعد الصغير ليهم ثقافة فارضه نفسها
اسف يا عمرو طولت كتير في الرد
بس من بعض ما عندي
وانت بتيجي على الجرح علطول :):)
تسلم ايدك و يسلم موضوعك الصادق
لا ولا يهمك انا عايز تفضفض ولازم كلنا نفضفض عشان ممنفجرش
ردحذف-----
منورنى دايما