اتصل بيا وافسرلك حلمك 100 %

طبعا كلنا دلوقتى ملاحظين برامج تفسير الاحلام فى التلفزيون والغريب ان كل اللى بيفسروا الاحلام يقال لهم شيوخا ( حاجة تغيظ ) 
والغريب اكثر من ذلك انهم فى العادة بيحيلوا تفسيرهم الى كتب تفسير قديمه( يعنى يقولك ذكر فى الكتاب الفلانى ان ريشة الحمامه المطلقه معناها كذا )
طيب انا هحكيلكم عن قصه سمعتها ولكن مع الاسف لا اعرف نصها  جيدا وهى عن شيخ اعتقد انه علامه ولكن ذاكرتى لا تسعفنى بالاسماء 
وهذا الشيخ ذهب اليه رجلا فحكى له انه حلم بنار فى مكان معين فقال له الشيخ اذهب فى هذه المكان واحفر فيه 
ولم يكدب الرجل خبرا وذهب الى المكان الذى حلم به واخذ يحفر واذا بكنزا عظيم اخذه الرجل ورجع الى بيته 
وبعد فتره حلم بنار فى مكان اخر 
ماذا يفعل ؟
تفتكروا هيعمل ايه ؟....( اجابه صحيح .. يروح يحفر)
فذهب الرجل ليحفر فى المكان الذى حلم به واذا به يجد جثة لقتيل 
انفزع  الرجل وذهب الى الشيخ الذى فسر له حلمه الاول وقال له حلمت بنارا فأمرتنى ان احفر فوجدت كنزا واليوم احفر فاجد قتيل ...!
هنا فسر له الشيخ ان حلمه الاول كان فى الشتاء .. وفى الشتاء تقترب من النار فهى مفيدة  ويفضلها الناس ومستحبة
اما حلمك الاخر فكان فى الصيف وفى الصيف ينفر الناس من النار ويبتعدوا عنها ( مش محتاجة فكاكه ) ..... تمت 

• فهمت حاجة ؟

انا اقولك انا استنتجت ايه من القصة دى 
اولا ان تفسير الاحلام ليس مجرد رموز ...,  ريشة فرخة وديل عنكبوت ورجل بطة وواحد احول , ولكنه يعتمد على كيفيه معرفتك بشخص راوى الحلم ( الحالم ) واحواله الماديه والنفسية..  وحتى الاحوال الخارجيه مثل الروايه السابقة
وليس تعليما يلقن ذلك انها هبه من الله عز وجل  والكل يعرف ان سيدنا يوسف عليه الصلاة والسلام  كان يفسر الاحلام ... اى ان هذه القدرة لا تعطى الا لاقل القليل من البشر الاتقياء , امثال الرسل  والانبياء والصالحين والعارفين بالله والاولياء
وليس كل من هب ودب وتجلى على شاشات الفضائيات بطلعته البهيه
فكيف تعرف ايها الشخص العبقرى الذى يفسر احلام الناس من سماعة التليفون ان هذا الرجل  ( نام وهو مش مستغطى كويس ) 

• ( الجعان يحلم بسوق العيش ) 

انه  تعبير دقيق عن بعض نظريات علم النفس لان بعض الاشخاص يحلم بالاشياء التى لا يستطيع ان يحققها فى الافاقه  يعنى لو جعان قبل ما ينام يحلم انه بيضرب جوز حمام محشى وطبعا لما  يتصل باخينا مفسر الاحلام اللى منور شاشة قناة تيييييييييت ( مبحبش التجريح ) ويقوله انا حلمت بحمامتيين فيبتدى الاخ مفسر الاحلام يغمض عينه ويرفع رأسه الى السماء ( سماء الاستديو )  , ويتلاعب بالسبحة التى فى يده ويقول بصوت خافت يبدأ فى الارتفاع , انت جايلك خير يابنى  مش عارف ازاى بس هيجيلك
- قولتلى ريشها كان لونه ايه..؟ 
المتصل محاولا ايضاح انها كانت محشيه : لا يا مولانا محـ
 - وكمان محـ  لا ده انت جايلك خير ياما
 المتصل محاولا الايضاح اكثر : محشـ
- محشـ باذن الله منصور يابنى 
فيغلق المتصل الخط ويذهب الى الفراش متمنيا ان يحصل على وجبه التحليه ( طبق مهلبيه  و واحد كولا زيرو )

وبهذا يجب ان يتقى هؤلاء الاشخاص الله فليس لمجرد المال, وشهرة التلفزيون ان يخرجوا علينا بما يضل الناس فليس كل حلم يفسر فاحيانا تكون الاحلام ليس لها تفسير كما الحال فى (الجعان يحلم بسوق العيش )فهذا الحلم دائما يكون تعبير عن رغبات داخليه وليس رساله الى الحالم 
فليتقى كل من يعمل بالاعلام الله  يكفينا هكذا جهلا وتخلفا ( خربت وجابت جاز والله )  
( بالحق محدش فيكوا معاه واحد كولا ليا ؟ )