مكان الدبله قبل وبعد الزواج - سر حان الوقت لاكشفه

 http://im2.gulfup.com/2011-04-22/1303488382201.jpg

في البداية محدش عنده عروسة ليّ !!

ولحين ما تقلب الموضوع في دماغك وتلاقيلي بنت الحلال اللي ترضى بواحد زي حالاتي عايز اتكلم مع حضرتك في موضوع كده

الموضوع مش بعيد اوي عن موضوع الجواز وهو (الدبلة) تلك الدائرة المعدنية اللعينة التي يعيش الشباب من الجنسين يحلمون بها ثم تقع الفاس في الراس ويلاقي نفسه / نفسها .. لابسها / لبساه .. والمعنى في كرش الشاعر

المهم الدبلة دي بقى لغز كبير -على الاقل بالنسبة لي- كنت دايما بسأل نفسي ايه سر لبس الدبلة في اليمين في الخطوبة ونقلها في الشمال بعد -يجعل كلمنا خفيف عليه- الجواز ؟!

وبما اني مش بحب افوت حاجة قررت ادور ورا الموضوع ده ولقيت عدة روايات وتكهنات هقولك عليها بعدين بس المهم اني انا كمان -بصفتي فيلسوف الغبرة على رأي أمي- عملت نظريتي الخاصة بموضوع الدبلة ونقلها من اليمين لليسار



اما عن الروايات اللي سمعتها بخصوص الدبلة فهناك منها
  • التاريخي
وده بقى بيقول لحضرتك ان ايام الرومان -اه والمصحف زي ما بقولك ايام الرومان- كان العريس والعروسة بيلفو حوالين رقابهم طوقين من الزهور دليل على ارتباطهم ثم تطور الوضع ليتحول لمجرد خيوط ملونة حول اصبع اليد اليمنى اثناء الخطوبة وتنتقل بعد الزواج لليد اليسرى لتكون قريبة من القلب قرينة على الحب ثم تطورت للشكل الحالي بخصوص الدبل والخواتم الذهبية والفضية والماسية .. وزي ما حضرتك عارف اهو كله خراب بيوت

وهناك الرواية المتشبه بـ

  • العلمية
ودي بقى حضرتك بتقول ان الخاتم المعدني كان بيوضع في اليد اليمنى عشان دي الايد اللي الواحد بيحلف بيها القسم دليل على ان الزوجين بيقسمو بالوفاء والبقاء والعيش سويا -والكلام اللي مايجبش همه ده- اما عن نقلها لليد اليسرى فده لان اليد اليسرى فيها شريان في الاصابع بيؤثر على نبضات القلب حاجة كده زي الحظاظات اللي بتزود نشاطك .. واهو كله ضحك على الدقون .. ولا بلاش موضوع الدقون ده

وهناك بالطبع الرواية

  • الدينية
ودي بقى اللي بتتكلم عن حرمة لبس الدبلة من الاساس (ليس كنوع من التوفير) ولكن على اعتبار انها من قبيل التشبة باليهود والنصار وهذة الرواية لا يتم التعويل عليها كثيرا وخاصة انك لن تجد من يتحدث بها غير اناس يبحثون عن حل اكل عين السمكة من حرمته ومعظم الناس بالفطرة قبل المعرفة لا تأخذ بمثل هذا المنطق

واخيرا رواية
  • العبد الفقير لله (فيلسوف الغبرة)
اما انا فلم استطيع ان اشعر بالراحة النفسية الا بعد ان توصلت لسر الدبلة وسبب نقلها من اليمين لليسار قبل وبعد الزواج

والحقيقة ان الدبلة في يد الشاب والفتاه على حد سواء هي دليل على انه مرتبط ولكن هذا الارتباط يختلف التباهي به في فترة الخطوبة عنه في فترة الزواج

ففي فترة الخطوبة (توضع الدبلة في اليد اليمنى) حتى تكون ظاهرة للعيان اثناء السلامات والتحيات والباي بايات والتلويحات

كنوع من الفخر و الفرحة فالشاب يريد ان يعرف كل البشر على كوكب الارض -والكواكب المجاورة- انه وجد من ترضى به وفيه ما فيه وبعد ان كان يكتفي بالقاء التحية من بعيد فبقى ما يصدق يلاقي واحد معرفة حتى لو بينهم وبين بعض قضايا يروح مسلم عليه سلام حار باليد ويحاول ان يبرز الدبلة لتكون واضحة بقدر الامكان

اما الفتاة فالدبلة وان كانت تلعب معها نفس الدور الذي تلعبة مع الشاب الا انها تزيد من استخدمها مع اصحابها الذين لم يصيبهم الدور وينتظرون نتائج القرعة القادمة وما تصدق تلاقي واحدة من صحبتها العوانس تروح تفضل تحرك في الدبلة ولو لقيت ان صاحبتها مش واخده بالها فمفيش مانع انها تروح مصوته بصوت ملفت واول ما صحبتها تبص وتسألها (-خير في حاجة ؟) ترد بكل قلاطة - اصل الدبلة ضيقة عليّ شوية وقرصت على صباعي .. حركات بنات بقى


اما بعد الزواج وبعد ان يتم اكتشاف مقدارالوكسة اللي حصلت والداهية السودا اللي نزلت على الدماغ و كل ده - طبعا- بعد فوات الاوان فمبيبقاش قدامه / قدمها  حل غير ان يداري الجريمة اللي ارتكبها في حق نفسه / نفسها

وهنا يأتي دور نقل الدبلة الى اليد اليسرى لتكون متوارية عن الانظار تماما ولا يوجد ما يمنع من ان توضع اليد اليسرى في الجيب اثناء السلامات والتحيات والباي بايات وحبذا لو تكون الدبلة ذات وزن خفيف حتى لا تشعر بها في يدك وتنسى الجريمة التي ارتكبتها في حق نفسك الغالية
وان كانت قعدة الزوجين  في البيت وشهم في وش بعض مش حتسمح بالنسيان

وهنا يأتي دور الزهايمر 


صحيح .. انسى موضوع العروسة اللي قولتلك عليها ..

تعليقات

إرسال تعليق

المشاركات الشائعة من هذه المدونة

[1] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job

اكواد المهن في التأمينات الاجتماعية

[2] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job