"لا تلومني على كلامي الذي لم انهيه ولا كتابتي التي لم تنهيها"

Tag.. ليه انا مدون

 http://png-2.findicons.com/files/icons/1602/blog/128/blogicons_blogger.png


اول ما  احمد ( سمو الامير ) قالى على موضوع التاج ده ... حسيت انى محتار
ما اصل العقل زينة .. العبد لله اصلا كل علاقته بالمدونات لا تتعدى كام شهر كدة وشوية ليالى
ولكن طالما وقعت الطوبة فى المعطوبة .. يبقى ما بدهاش .. وان كان انت - عزيزى القارئ - اللى خسران , اية اللى يهمك تعرف معلومات عنى .. وبقولك من دلوقتى اهو .. يمكنك التراجع واهو تبقى نفدت بجلدك


نبدأ على بركة الله




http://png-3.findicons.com/files/icons/1972/wood_social_networking/512/blogger_webtreatsetc.png


تعريف مختصر بالمدون
الفقير لله .. عمرو------ عواد ... وعواد هو الاسم الثالث, اتعودت على الاسم كدة واصبح هو الاسم الاساسى ولا استدعى الاسم الاوسط غير فى الاوراق الرسمية
طبعا كان فى بعض المشاكل مع عواد , لان الاذاعة المصرية من دون الاسامى الى فى الدنيا, اختارت الاسم ده عشان تخليه باع ارضه, بس شوية بشوية كل ما اكبر اعرف ان مش عواد بس اللى باع ارضه D: , وانتهت عقدة الاسم والحمد لله .. وإن كنت لسة فى فترة النقاهة



.. طالب بالفرقة الرابعة الليسانس ”, كلية الحقوق جامعة عين شمس .. على مشارف الـ 22 حتة  .. ادبست فى الكلية دى عن طريق التنسيق - كسائر الشعب المصرى - ولكن بعد فترة من «الشد والجذب»  اتعودت عليها وهى كمان رضيت بيا واخدنا بعض عن حب  ...


احب القراءة فى اى شئ وعن اى شئ وانا كنت مقل بسبب الدراسة .. 
افضل القراءة عن الاسلام وخصوصا التجديد فى الفقة ... والروايات  .. والشعر العامى .......... ( مش متوافقين خالص )





مكانته العلمية والدراسية  التى وصل اليها والتى من خلالها يستطيع أن يقدم  خدماته للمجتمع
زى ما كتبت, انا فى كلية الحقوق و لسة باقى كام شهر على انهاء الحياة الدراسية .. وطبعا السؤل بيقول (والتى من خلالها يستطيع أن يقدم  خدماته للمجتمع ) .. و بحالتى كدة مقدرش اقدم اى خدمات للمجتمع ولا لنفسى, ..... على الاقل باستخدام دراستى لانى لازم انتهي منها  وكمان اتدرب تحت ايد كوتش يكون خبرة ومتودك فى المحاماة

اتمنى ....  اذا وفقنى الله فى عمل المحاماة, واختار الله لى هذا الطريق .. ان يجعلنى  سبب فى ارجاع بعض  من الحقوق الضائعة فى بلدنا 
لان طبعا مش محتاج يكون نظر سعادتك 6 / 6 عشان تعرف ان الحقوق فى بلدنا محتاجة لمنادى بتاع ( عيل تايه يا ولاد الحلال ) والعدالة بسم الله , الله اكبر .. واخدة قرصين منوم وقاعدين عليها مفطسنها 


متى كانت البداية فى التدوين (بالتاريخ )؟ 

كانت لى كام بداية من قبل .. بس المدونة دى هى بدايتى الحقيقية

وبقدرة قادر سجلت انشاء المدونة بالدقايق .. كان قلبى حاسس انى هتسأل السؤال دة 


المدونة اتعملت يوم 22 يونيو 2010 - 22/6/2010
اللى هو يوافق الثلاثاء
10 رجب 1431
الساعة 01:50 بعد منتصف الليل 



كيف كانت البداية فى التدوين ؟
مفيش قصة مميزة لبدايتى فى التدوين كل الموضوع انى ساعات بحب اكتب اللى يجى على دماغى فقررت انى اسجله فى مكان واحد ووجدت ان شبكة الانترنت هى المكان الافضل 
وكان لى خبرة بسيطة بموضوع انشاء المدونات .. الا ان اسم المدونة كان العبقة الاكبر فى انشائها 
فكرت اسميها اكتر من اسم ( هوامش على دفتر الوكسة - فزلكة - خيبتنا ), .. ولكنى حسيت ان كل اسم من دول هيحشرنى فى نوع كتابة معينه, ولانى بحب اكتب فى كل حاجة منغير تقييد, واحيانا اتطرق للكتابة فى موضوعات هامه لا تحتملها الاسماء السابقة .. مثل ( ديننا الاسلامى ) قررت ان مادام كل الحاجات دى انا, .. وبحب اتكلم فيها, .. يبقى خلاص هتبقى اسمها عواد .. ( اللى مابعش ارضة يا ولاد)
واكتفيت بعمل الاسماء السابقة اقسام للمدونة .. 2 فى 1 يعنى, ... زى الشامبو والبلسم كدة




ليه أنت مدون ؟ وما هى طموحاتك فى هذا المجال وماذا تسعى له بموقعك وإلى أى مدى تريد أن تصل فى التدوين ؟
لية انا مدون...  .ساعات بحب ازعق شوية من اللى بيحصل حوالينا عشان مانفجرش .. وكتير بحب انقل معلومات عندى ارى انها صحيحة ويجب ان يعرفها اناس اخرين .. وقليلا بيكون تعبير عن نفسى ... لذلك انا مدون




وما هى طموحاتك فى هذا المجال وماذا تسعى له بموقعك وإلى أى مدى تريد أن تصل فى التدوين... الصراحة قليلا ما اقتنع باللى انا بكتبه ... وكتير بيصعب عليا القارئ الغلبان اللى حظة الاسود حدفة على مدونتى .. ماله هو يقرا لواحد زى حالاتى 
لذلك طموحاتى فى المجال دة تتلخص فى جملتين ... “ إن كان ما اكتبه جيد فاتمنى ان انجح واكمل المسيرة .. وإن كان ما اكتبه ردئ فليس لى ان اتمنى الحصول على ما ليس من حقى ”   .




اذا كنت عزيزي القارئ وصلت الى ما هو مكتوب امامك دلوقتى .. افرح وزقطط .. انا خلصت كلام ... وانت قدرت تستحمل تسمع عنى كل الكلام اللى فات .. عارف انه ممكن ميكونش مهم بالنسبة لك ... بس شكرا جزيلا لاحتمالك رغيي


والان نحدف الكورة فى الملاعب التالية :






ودى اسئلة التاج متجمعة فى حتة واحدة 


  • تعريف مختصر بالمدون

  • مكانته العلمية والدراسية  التى وصل اليها والتى من خلالها يستطيع أن يقدم  خدماته للمجتمع 
 

  • متى كانت البداية فى التدوين (بالتاريخ )؟ 

  • كيف كانت البداية فى التدوين ؟ 

  • ليه أنت مدون ؟ وما هى طموحاتك فى هذا المجال وماذا تسعى له بموقعك وإلى أى مدى تريد أن تصل فى التدوين ؟