"لا تلومني على كلامي الذي لم انهيه ولا كتابتي التي لم تنهيها"

طبق طبقنا طبق فى طبق طبقكم


 http://www.falboart.com/Cubestraction_Series/images/Tobeornottobe.jpg


شعرت مع بداية الدعوى للاستفتاء ان هذا الاستفتاء مقلب .. حتى ولو لم يكن مقصود
مقلب من النوع التقيل .. حيث انك لن تعرف بعد ان تنقلب الى اين ستذهب وكيف ستكون الوقعة .. يعني على وشك ولا على قفاك .. وهذا بالطبع ما يفسر ترددي لاكثر من اسبوع بين (نعم) و(لا) حتى انني بدات اترنح الى (المقاطعة) من اساسه
وكانت مصائب الاستفتاء لا تنتهي من يوم بدات العمل على التعديلات
اولا قالوا هنعمل لكم تعديلات ثم نطرحها للمناقشة ثم نعيد صياغتها بعد معرفة اراء الشعب
... لاحظ ان الشعب من الاول اتحايل عليهم يعملوا دستور جديد
وبدات وسائل الاعلام تشتكي من ضيق الوقت .. ولكنها عملت بكل جهد في استضافت اللى فاهمين واللى مش فاهمين ..
وهذا ينقد وهذا يدافع .. واخر جاء ليظهر على الشاشة ويعمل للولية باي باي
واحنا مطرطقين ودنا على الاخر وهاتك يا تحليلات .. وتحليل ورا تحليل والنتائج في المعمل باذن الله يوم التلات بعد صلاة الجمعة
وكانت الفاجعة .. امك في العش ولا طارت ؟ .. مش هنعدل حاجة
وهو دة اللى عندنا والاستفتاء السبت اللى جاي .. حد ليه شوء في حاجة ؟
طيب يا عم متزوقش .. بس عايزين استفتاء نزيه .. ودة طبعا لان سمعة نزيهة مش تمام
وبدأت غزوة الصناديق .. اللى هيقول لا هيدخل النار .. اللى هيقول نعم هيتبني له بيت في الجنة
قول نعم عشان الاستقرار
قول نعم عشان البلطجية يمشوا
قول نعم عشان الجيش ميقعدش
قول نعم عشان حكم العسكر كخة ووحش
وكان من الواضح ان سكة (نعم) واضحة المعالم .. اما سكة (لا) فهي سكة اللى يروح مايرجعش .. هكذا صوروا الموضوع لنا
وعلى الرغم من محاولة افهام البعض ان (نعم) تعمل مشاكل
منها ان (نعم) معناها تفعيل دستور 71 وهو ما يعني بطلان تنحي مبارك وبطلان استلام الجيش للسلطة وبطلان حل مجلس الشعب والشورى .. نهايته بطلان الثورة ..
ام في حالة لا وكما صرح المسؤولون .. هنعمل اعلان دستوري وبعده نكتب دستور نضيف وبعد كده انتخاباتك النزيهة .. بعد ما سمعتها تنضف طبعا
بس تقول لمين .. لقد اختار اهل الدين نعم .. او هكذا قالوا للشعب
فاختار شعب مصر استفتاء بطعم نعم .. والقلة المندسة صاحبة الاجندات الامريكية كما وصفهم موقع الاخوان اختاروا لا .. اه يا وحشين هتروحوا النار
وخرجت الاصوات تهتف بحياة نعم وجاءت نعم .. حمد لله على سلامتها .. زغرودة يا ولاد
ولكن .. يالا الكارثة .. نعم مش حلوة زى امها ولا ذكية زي ابوها
نعم مامشتش الحرمية .. ولا المجلس العسكري .. طب خد دي .. نعم ما بدخلش الجنة
يلهووووووووي نعم طلعت مابدخلش الجنة
وعشان يداروا الفضيحة .. وعلى طريقة بهيج .. بص يا برنجي .. احنا عدم المؤخذة كدة هناخد الحلو من هنا ونقوم ظبطينة على الحلو من هنا ونعمل بقى السليمة ونطلع حاجة استيك .. شغل فنادق كده
فقرروا بدل ما يفعلوا دستور 71 اللى بالطبع لو اتفعل يودي البلد في ستين داهية .. لا وايه يرجع مبارك كمان .. هههههه شوف بقى لو مبارك رجع
قالوا يعملوا اعلان دستوري .. الله طب ما احنا طلبنا كدة من الاول .. كان لزمة ام الاستفتاء ايه ؟ هو طبعا مش نفس الترتيب اللى طلبناه لان انتخابات البرلمان هتبقى قبل عمل الدستور .. والبرلمان هو اللى هيحط الدستور .. بس خلينا ورا الاعلان لحد باب الدار
بس على مين .. هي البلد دي لو ليها في الخير كان حكمها مبارك 30 سنة اصلا
ولادة الاعلان الدستوري متعثرة بشكل غريب .. يعني لا ولادة طبيعي نافع ولا بعملية نافع .. حتى جابوا السبكي عشان يزعق ويقول ( اولدي ) بس بردة الاعلان مش عايز ينزل
اللجنة اجتمعت ووضعت تصورا مبدئيا، وقرر المجلس مراجعته بواسطة لجنة أخرى للتأكد من قبوله لدى المجتمع، إلا أن اللجنة الثانية اختلفت مع تصور اللجنة الأولى وعدلت فيه وأضافت إليه بعض المواد، وعلى إثر ذلك قرر المجلس العسكري تشكيل لجنة ثالثة مكونة من أعضاء اللجنتين وعدد من شخصيات المجتمع لوضع تصور نهائي للإعلان الدستوري.
على نظام طبق طبقنا طبق فى طبق طبقكم يقدر طبقكم يعمل اعلان دستوري ؟
نهايته انا مش فاهم حاجة
مش فاهم احنا عملنا استفتاء ليه
مش فاهم ازاي نعمل استفتاء واحنا مش عارفين (نعم) تودي على فين و(لا) تودي على فين
الصراحة انا قلقان .... ومن الاخر اللي اخد طقبنا لازم يرجعه