النكت المصرية والفتن الاقليمية


 http://photoshopcontest.com/images/large/pvgr347p2afb4p1h7opkul4gk83inindglro.jpg

قد سمعنا عن جميع انواع الفتن اما اخر ما توصلنا الية فى مجتمعنا المصرى هى الفتنة الاقليمية 
وهنا لا اعنى نهائيا الفتن التى تحدث فى اقليم بعينه ولكنى اقصد الفتن ما بين الاقاليم ..
الفتن ما بين الصعيد والدلتا والسواحلية والقاهريين وهكذا 
ومن الممكن ان تسأل حضرتك .. ( هو فعلا الفتن دى موجودة ؟) نعم الفتن دى موجودة وتلاحظها بسهولة عندما يجيئك صديق ويقول : سمعت اخر نكتة ...!؟" هنا تعرف انك على مشارف سماع احدى الفتن الاقليمية "
فاننا وان كنا شعب محب للنكتة وصانع للضحكات الا اننا لا نجعلها عامة تحت اى ظرف ولكن يجب ان تكون 
( مرة واحد فلاح , مرة واحد صعيدى , واحد دمياطى , واحد بلديتنا , مرة اسكندرانى ... واعذرونى يجب ان نكتفى بهذا القدر  لاننا وبعد التعديل الرئاسى الاخير اصبحنا 29 محافظة وليس لدينا وقت لكتابة اسمائهم )
ولكن ... لماذا هذة التفرقة ؟
اسمع كثير من المعارف يتناولون الفرد ويفسروه ويحللوه من خلال منطقته فمثلا الصيدى 
قفل ( أفل ) .. وتكون الجملة ( سيبك منه ده عيل أفل ) 
(او غبى) .......... ولها عدة تعبيرات 
ده صعيدى ومخة جزمة , او صعيدى ودماغة ناشفة 
ناهيك عن النكت البغيضة والمضحكة- مع الاسف -  فى نفس الوقت والتى يُتناول فيها الصعايدة بابشع التصويرات للدلالة على غبائهم فهل يعرف من يقولون هذا عن من يتحدثون ؟
انهم يتحدثون عن اكثر من نصف الشعب المصرى حيث يمتد الصعيد من الجيزة الى اسوان 
وان كان هذا هو حال الصعايدة فى مصر فلم يختلف كثيرا حال اهل الدلتا ويطلق عليهم مجازا فلاحين 
وهؤلاء دائما فى نظر عميان القلب والفهم ( غير متحضرين ) 
فيقال مثلا على الفلاحين 
جاى من ورا الجاموسة .. ومش عارف تعباه فى اية الجاموسة
وهناك بعض التعبيرات والتى تفهم دائما من طريقة النطق مثل 
ده عيل فلاح , او دى بت فلاحة .. ( والتى تقال دائما مع عوجة بؤ ورفع للانف )
اما عن سكان المنوفيه ورغم انهم فى الاصل جزء من اهل الدلتا ( الفلاحين ) الا ان لهم وضع خاص مع الفتنه الاقليمية
فانهم يتهمون دائما بانهم بخلاء وبخلهم غير عادى .. ويمكنك التعرف على هذه الصفة التى تلصق بهم من كمية النكت الرهيبة والذى يمثل فيها المنوفييون ( المنايفه ) دور البطولة مع الشح والبخل 
فيقال ده منوفى جلدة .. مع وضع اصبع الابهام تحت الاسنان العلوية ومحاولة اخراجه بصعوبة - (اتمنى تكون الاشارة معروفة ?):D
مع اننى قد وجدت بخلاء من القاهره والصعيد وسواحلية ومنايفة 
الكل على حد سواء فهناك الكريم والبخيل فى كل البلاد
ولكن ما هو السبب فى الصاق هذه التهمه بالمنايفه ؟ ........  لا اعرف 
وعلى النقيض مما يقال عن المنايفه فهناك الشرقاوية والذين يتفردون فى النكتة المصرية بالكرم الزائد عن الحد .. ورغم انها صفة طيبة يتمنى اى شخص ان تطلق عليه الا ان الشرقوية انفسهم اصابهم الملل من هذا الكرم والذى يستخدمة البعض  لدلالة على انهم سوذج
وفى اخر القول مع اهل الدلتا فهل يعرف من يتناولهم بهذه الاقوال من هم اهل الدلتا انهم يمثلون كثيرا من مصر فالدلتا تتكون من 8 محافظات بالتمام والكمال 
وهكذا يمكن ان تجد النكت المصرية كأس يدور على كل المحافظات المصرية دون استثناء .. وان كنت قاهرى فمن الصعب ان اجد النكت التى تطلق على القاهريين ولكنى لا استبعد نهائيا ان يكون اهل المحافظات الاخرى يعاملونا بالمثل ويطلقون علينا نكت من جنس ما يـُطلق عليهم 
وعلى الرغم من استيائى  من هذه التفرقة الاقليميه الان اننى اجد - ومع الاسف - هذه النكت مضحكة الى اقصى درجة ... فما العمل اذا.. ?            { :)) }

تعليقات

  1. "وعلى الرغم من استيائى من هذه التفرقة الاقليميه الان اننى اجد - ومع الاسف - هذه النكت مضحكة الى اقصى درجة ... فما العمل اذا.. ? "

    على فاكره انا مقاطعه النكت خالص خصوصا اللى بتتكلم عن مصرى او عربى حتى بيستغربواعليا اما اضحك غصب عنى
    واقول "استغفر لله العظيم" والله بحس انى فعلااتريقت على حد اعرفه مع ان النكته بتيجى مبهمه من غير ما تقصد حد بعينه :(

    ردحذف
  2. ☼ شخابيط ☼

    هى فعلا محتاجة واقفة ... بس موضوع المقاطعة دة ساعات مبينفعش .. اصل اللى بيقول نكتة بيرميها فى وش الواحد فى جزء من الثانية

    نورتى المدونة

    ردحذف
  3. واحنا لو بطلنا نكت ...هنعيش ازاى وادوية الضغط والسكر ودوا حرقة الدم غاليييييييييييييييييييين؟!!

    ردحذف
  4. ۞ safa7_karmooz ۞

    والله الموضوع ده مش فارق كتير بـ نكت منغير نكت الناس دمها اتحرق والضغط والسكر مش عتقين :D

    شرفتنى زيارتك

    ردحذف
  5. بص يا عم عمر
    أنا اتعاملت مع شخصيات كتير من أماكن كتير في مصر
    اغلبهم صعايدة و منايفة و الأسكندرانية طبعاً

    و الله العظيم أنا لاقيت في ناس من المنايفة و الصعايدة و صاحبتهم و هما دلوقتي من أعز اصدقائي و مازالنا بنسأل علي بعض رغم تخرجنا من الكلية و انشغال كل واحد في عمله ألا أن انننا ما زلنا بنسأل علي بعض

    الناس الكويسة موجودة في كل حتة
    و الناس اللي مش كويسة موجودة في كل حتة

    دي الخلاصة

    و أنا لما بلاقي حد هيدأ بيقول نكتة أولها كده بقوله بلاش أحسن

    الرسول (صلي الله عليه و سلم) لما جاء واحد و قال أنه انصاري و اخر من المهاجرين قال له

    دعوها فأنها منتنة

    ردحذف
  6. ◘ سكندر ◘

    و الله العظيم أنا لاقيت في ناس من المنايفة و الصعايدة و صاحبتهم و هما دلوقتي من أعز اصدقائي و مازالنا بنسأل علي بعض رغم تخرجنا من الكلية و انشغال كل واحد في عمله ألا أن انننا ما زلنا بنسأل علي بعض

    --------
    والله هو ده الكلام .. بس على فكرة مش كل اللى بيقول نكت من الشكل ده بيبقى قاصد ولا حتى اللى بيعلق على واحد عشان بلدة بيبقى مبيت النيه .. ساعات بتطلع لوحدها مع ناس بس بتبقى رخمة وممكن تزعل منه اللى بيسمعها


    الناس الكويسة موجودة في كل حتة
    و الناس اللي مش كويسة موجودة في كل حتة

    --------
    مضبوط فعلا


    نورت التدوينة

    ردحذف
  7. اه أنا معاك
    بص في ناس خلاص أخدتها بهزار و ما عدتش بتفرق معاهم لدرجة أن لو اتنين منايفة واحد فيهم أبخل من الثاني ، الاول يقول لثاني "البخيل أكثر"

    دا أنت منوفي (:

    و نفس الحكاية مع الصعايدة ، دا أنت دماغك ناشفة قفل ... أنت صعيدي ولا ايه ؟؟؟!! ههههه

    و علي فكرة في حاجات علي القاهروية برضه بس
    بيقولوا عليكم "مية نيلي و ..."

    كمل أنت بقي ، بس من غير زعل
    (:

    ردحذف
  8. ◘ سكندري ◘
    نورت مرة تانية يا كبير
    عندك حق والله وانا شفت الموضوع ده بنفسى كتير

    -
    اما على موضوع ( القاهروية )
    فاولا عشان اكمل المثل اضطريت استخدم حبيب الملايين جوجل
    وعرفت بقيته
    مية نيلى, ووشوش خـ .. .. :D
    ومنغير زعل والله ;)
    بس على فكرة الموضوع ده مغلوط
    عشان مية النيل بتستخدم من اسوان لدمياط .. وبتوصل للسواحلية كمان :|
    ده غير اصلا ان احنا مبتوصلناش مية النيل وتسمى اصطلاحا ( مية حلوة ) غير مرة فى الاسبوع وبقيت الاسبوع شغالين على المياه الجوفية وتسمى اصطلاحا ( مية مالحة , او مية ماتور )
    يبقى لو العبرة بالنيل فـ 90 % من القاهريين برة الموضوع ده

    نورت ...

    ردحذف

إرسال تعليق

المشاركات الشائعة من هذه المدونة

[1] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job

اكواد المهن في التأمينات الاجتماعية

[2] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job