وهم الاعجاز العلمى - نكته واطيه... ولكن - بتقول ايه ؟ - عذر اقبح من ذنب


http://shots.ikbis.com/image/163100/screen/m11.bmp

يا رب تكونوا كلكم بصحة وسلامة وخصوصا ارجلكم فهناك بعض القائلين ان راحة الجسم تبداء من القدمين وانا بعيد عنكم رجليا مفأفأه وهذه الكلمة - مفأفأه -  فى قاموس معتز هانى للكلمات اللى بتفسخ الخطوبة درجتها 10/10 بس طالما انا مش بكلم خاطبتى ده لانى اولا مش خاطب وشكلى مش هخطب و ثانيا لان الحالة المزرية اللى عليها رجلى دلوقتى لازم تصاحبها كلمة مفأفأه تحت اى ظرف وفى اى حال
المهم انا رجلى مفأفأه لية ؟

ولكن اولا اعذرونى لانى هخرج من الموضوع لحظة واقول جملتى المشهورة اللى عدتها فى المدونة هنا اكتر من عشر مرات ( النت وموضوعاته هو سبب شقائى فى حياتى ) ... تمت 
نرجع لموضوعنا كنت بدعبس فى النت كعادتى اللعينة والتى ساقلع عنها باى شكل حتى لو هكسر الجهاز واذا بى اجد جوجل افندى يخرج لى من ضمن نتائج البحث لينك تقشعر له الابدان ويشيب له الولدان " وهم الاعجاز العلمى  ( وقد شهد شاهد من اهلها )" 
ايه ده .... ؟ 
الله الله الله ايه الكلام ده مين دول ومين ده اللى شهد نهاره اسوح 
ودون تررد او تخاذل غامرت بحياتى وضغط على يدى لتضغط على اللينك 
انه منتدى مسيحى يتحدث عن كتاب لدكتور - خالد منتصر اسمه وهم الاعجاز العلمى 
وتحدثوا عن ذلك الشجاع الذى قرر ان يفهمنا ان ما نراه من معجزات علميه فى القران  هو مجرد توهمات نصنعها لعقده نقص بداخلنا مستعينين بلوى عنق الكلمات على حد تعبيره
طبعا وجدت ناس ردت واتكلمت ودخلو فى نقاش من اللى قلبك ميحبوش واستهانه بالدين والمقدسات فرفضت ان ادخل فى هذا العبث ( اوعى وشك ) ولكن قررت انى يجب قبل ان احكم على هذا الطبيب الذى اعشق مقالاته واسلوبه وان اختلفت معه فى بعض الاشياء ان ارى ماهية الكتاب
وبالفعل حضرت العده برنامج لتشغيل ملفات pdf ورحت منزل الكتاب وهاتك يا قراية لدرجة ان معاد نومى جيه ( كانت سته الصبح ) بس انا كملت للساعة عشره ووصلت فيه لصفحة 70  على ما اذكر 
طبعا دلوقتى انت بتقول : انت هتروشنا معاك ليه متقول حصل ايه لرجلك والسلام .... خلص 
- حاضر جايلك اهوه متزوقش 
المهم وجدت انى مش هقدر اكمل قرايه ملف الكتاب على الكمبيوتر وقلت ان هنزل اشترية وفعلا رحت مدعبس فى النت ( الله يخرب بيت ام النت وسنينه السودا ) لحد ما لقيت موقع دار الكتب وفيه معلومات عن الكتاب وعرفت اماكن بيع الكتاب واخترت 3 اماكن اروحهم  فى القاهره مدبولى , والشروق , والمكتبة الوطنيه 
وبدات الرحلة 

نكته واطيه... ولكن 
ذهبت اولا لمكتبة مدبولى فى ميدان طلعت حرب وكان المشورا من المترو للمكتبة فوق المستفز ده طبعا لانى نزلت من المترو بدرى محطه على انى هتمشى فى وسط البلد واجيب الكتاب واروح ( مكنتش اعرف اللى فيها ) 
  وصلت والحمد لله
دخلت المكتبة 
- سلام عليكم
- وعليكم السلام 
- حضرتك انا عايز كتاب لدكتور خالد منتصر اسمه ... و .. وه ... وهم   ( مش قادر انطقها ) 
- استجمعت قوتى 
- وهم الاعجاز العلمى فى القران 
- راح  قايلى لا والله مش موجود ,..  بس موجود كتاب فوبيا العلم 
وهنا تذكرت على الفور نكتة البقال اللى مشغل عنده عيل صغير وكل ما واحد يجيى يسئلة على حاجة يقولة مفيش فنصحة صاحب المحل دائما ان يقدم له البديل 
فدخل زبون وطلب بكرة مناديل ( ورق تواليت )  قاله معندناش بس فى سنفره 
هى مضحكش بس ابتسم وجاملنى 


بتقول ايه ؟

خرجت من مكتبة مدبولى لاقوم باللف والدوران حولين ذاتى عشان ادور على الشروق وهى طبقا لدار الكتب فى نفس  الشارع بس انى القيها ابدا تقولش غشاوه نزلت على عينى 
لحد ما لقيت راجل قاعد بيحرس محل تقريبا  المحل كله  انقرض ولم يبقى الا الحارس بقولة هى فين مكتبة الشروق قالى بكل سخريه على عبطى الذى لم يجد مثله من قبل - ما اهى وراك ويا وكستا المكتبة كانت فى وشى وانا اللى شكلى اتعميت 
وفعلا دخلت كما السبع  ومنستش اخد حبيتين جراءة قبل ما ادخل
- سلام عليكم 
- عليكم السلام 
- انا بدور على كتاب لخالد منتصر اسمه .......... بخ.. راح الكلام مش عارف انطق اسمه مهو اصلى انا مش مصدق نفسى ,انا عايز اقراء كتاب زى ده ؟
- ايوه يا استاذ اسمه الكتاب ايه 
- وهم الاعجاز العلمى 
- بتقول ايه ؟
- وهم الاعجاز العلمى فى القران 
تانى - بتقول ايه ؟
ما خلاص يا عم انا مصدقت نطقتها 
- وهم الاعجاز العلمى لخالد منتصر 
واذا بكل الموجودين يستنكروا الاسم
 - وهم الاعجاز العلم , وهم الاعجاز ايه دة ؟
فيبدوا ان اسم الكتاب لم يعجبهم او لم اعجبهم انا شخصيا
- لا والله مش موجود بس ممكن يكون لسه هيوصلنا 
- ده طبعة 2008 ولسة فى الطريق ؟ طب متعرفش مكان دار العين فين ( دى الدار اللى طبعة الكتاب )
وبعد سؤلات وجوبات - فى روض الفرج 




مشوار على فشوش


رحت طالع على روض الفرج وبعد ما دبيت مشوار من اللى قلبك يحبه وهاتك يا تنطيت من مترو لعربية لاتوبيس راجعت نفسى ... دى دار للطباعة مش للتوزيع 
فقررت ان اتصل اولا بتليفونهم الذى حصلت عليه بشقلبات استخبارتيه جامده جدا ولكن لم يجيبنى احد فخفت ان اكمل المشوار على الفاضى وقررت ان اعود الى اخر امالى


عذر اقبح من ذنب 

 بقى لى امل واحد ويا صابت يا خابت المكتبة الوطنية فى الحلمية رحت متشعلق فى اول مترو يقابلنى وعلى الحلمية - طبعا كل هذا يتخلله دقائق لا يستهان بها من الموتورجل - نزلت فى المحطة وترجلت  تبعا للوصفة فى موقع دار الكتب ( موقع ما يعلم بيه الا ربنا ) 
واسئل يا عم على المكتبة ... ولا حد عارف عنها حاجة كأنها فى صحرا او كأنها لابسة اسمنت الاخفا
محدش يعرف عنها اى حاجة 
مع العلم انى لو سئلت عن اقرب قهوه ( كوفى شوب لـ ولاد الذوات ) الف من يدلك 
وبعد عناء وتمحيص وده يقولك هو قالك فين ... مهو لو قالى هسئل سعادتك ليه 
وده يقولك بص خد الشارع ده على طول... والكارثة ان الشارع يمتد على مرمى البصر 
نهايته وصلت والحمد لله 
دخلت على المكتبة وكلى عزيمه على الا اتردد فى نطق اسم الكتاب هذه المره 
واذا بشابه لطيفة تحدثك وتسألك عما تريد فتفهم انها قاعده فى صحرا فلا احد يشترى كتب فالكل يكتفى فى هذه الايام بشراء الكباتشينو
قلتلها عايز كتاب لخالد منتصر اسمه وهم الاعجاز العلمى
نظرت لى نظرة استنكار شديدة 
- عايز ايه يلا ؟ اكيد قالتها فى سرها 
- لا والله مش موجود
وفى هذه اللحظة يبدوا انها فكرت فى ان تنال ثواب وان تردنى الى الطريق القويم وترشدنى الى السراط المستقيم 
- بس فى الاعجاز العلمى فى القران لزغلول النجار 
- لا مهو انا عارف بس ده نقض ليه مش موجود خالص ؟
ويبدوا انى اخترت الكلمات التى لا تصلح فى هذا الموقف 
وشعرت انها تقول بينها وبين نفسها  نقض لـ  ايه يا بابا ؟ ( عذرك اقبح من ذنبك ) 
وجوابك اقبح من سؤالك 
- لا مش موجود 
وراحت عامله للخلف دور وسبتنى اناغرقان فى عرقى وعايز ازعق واقول
لا والله انا مش منهم ده انا من بتوع زغلول النجار زى زيكم 
ولكن لم تأتى لى شجاعه لابوح بما فى داخلى 
واكتفيت بالحملقة فى كتاب للشيخ الغزالى حتى تفهم انى مش من الناس التانيه بس هيهات لم يعد يجدى 
رحت واخد بعضى ورامى سلام فى سرى على اللى موجودين  ورحت مروح 


وجيت احكلكم عن مأساتى المزدوجة من كاتب الكتاب ومع كتابة 




ختام 


ساضطر اسفا الى قراءة الكتاب من النسخة البى دى اف pdf وامرى الى الله ولنا حديث اخر عن تجليات عبقرى زمانه خالد منتصر 


ملحوظة 


  • الكتاب قديم جدا من حوالى 5 سنين ( الطبعه الاولى كانت فى 2005 ) ويبدو ان  الدكتور خالد بيفتخر بيه وحاطة على موقعه يمكنك تحميله 
  • وجدت على النت كثيرا ممن تجادلوا حول الكتاب وتجليات عبقرينو فساحاول ان اقراء ما كتب وساحاول ان اجد ردود على كتابة ثم لى بعد ذلك موضوع اخر على مستر مرتن لوثر العرب 
  • انا لست من هؤلاء المتشددين بل انى اعتبر نفسى من المعارضين لهم على طول الخط فانا من معارضين السلفيه والوهابيه وهذه التيارات التى تبدوا عليها سمات التاخر وتشدنا الى الوراء  ولكنى فى نفس الوقت من المعترضين على هؤلاء الذين يدعوا التفتح والاصلاح من نوعيه انسوا بقى الدين واللى مكتوب فيه وانسوا التدبر فى القران

تعليقات

  1. نا عجبني جدا طريقة تفكيرك
    لانها تقريبا نفس اتجاهي
    فانا لا احب التشدد و التعصب الاعمى
    ايضا اكره جدا من يفتري على الله الكذب

    عجبني الموضوع و شدني اني اروح ادعبس على الكتاب انا كمان

    تحياتي يا عمرو

    ردحذف
  2. أزيك يا عمرو
    ألف سلامة علي فافأة رجلك هقولها براحتي هنا و معتز مش هياخد باله ولأن أنا أنت مش خاطبيين فمش مشكلة D: D:

    فعلاً أنا مش جايبني و را - و قدام في نفس الوقت - ألا النت لأني كثير الدعبسة علي الأنترنت و العم جوجل بقي مش مخلي علي جهده جهد و كل حاجة أنت عايزها - او حتي مش عايزها- بيجيبهالك لغاية عندك و أنا كنت كتبت قبل كده تدوينة عن مساؤئ الأنترنت العشرة ابقي أقرأها إن شاء الله هتعجبك http://sacandary.blogspot.com/2010/04/blog-post_07.html

    نيجي بقي للمفيد

    أنت لو حبيت ترد علي واحد واحد و تسمع رأي الناس كلها في حاجة معينة مش هتخلص بس هو الفضول اللي موجود فينا ده !!

    أنا ما عرفش خالد منتصر غير أن له برنامج علي دريم اسمه دريم كلنكس و مش عارف ايه ظروف البرنامج ده كمان بس أنا شفت له حلقة مع د. عيون كان بيتكلم علي الليزك عجبتني الحلقة أنما غير كده مش عارف فمش هحكم عليه بحاجة ، أنا هنتظر عرض الكتاب عندك و إن شاء الله يكون مفيد

    ردحذف
  3. ZEMA
    اشكرك على الاطراء الجميل ده
    وبالفعل فنحن دين وسط واعتدال فلا افراط ولا تفريط

    ---
    سكندرى
    هو فى العن من جوجل اى حاجة تقوله عليها يجبلك 100 موضوع حوليها وتلوس انت فى الوسط
    وان شاء الله سا قراء التدوينه ولى رد عليها باذن الله

    اما موضوع الرد على كل واحد فانت جبت المفيد هو الفضول ولا شئ غيرة اللى جايبنا وره

    وعن دكتور خلد منتصر فانا اعتبرة رجل عقلانى واخر جمال ولكن تقريبا عقلانيته شطحت منه
    وهو كان بيقدم فقرة طبيه فى العاشرة مساء قبل برنامج على دريم 1 ( دريم كلينيك )
    وانا كنت بتابعه وبيكتب عمود يومى فى المصرى اليوم اونا بردة كنت من اكتر متابعيه وان اختلفت معه
    ولكنى صدمت فيه وفى افكارة
    ----

    ساكتب رايى فى الكتاب بعد الانتهاء منه ان شاء الله فى المدونة هنا

    ردحذف

إرسال تعليق

المشاركات الشائعة من هذه المدونة

[1] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job

اكواد المهن في التأمينات الاجتماعية

[2] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job