"لا تلومني على كلامي الذي لم انهيه ولا كتابتي التي لم تنهيها"

لماذا احترمت عبد الرحمن الكيلانى



فى الاول كدة احب اشهد على نفسى واعترف انى غاوى مشاكل 
مش اوى طبعا بس بردة ساعات بسعى لها 
وكتير ادخل ارد على موضوعات شفتها صدفة وانا بقلب فى صفحات النت وتكون هى السبب فى وجع قلبى
واللى هحكيهلكم  ده حدث بالفعل 
اول ما كنت بتعلم استخدام البلوجر كنت بتررد على منتدى اسمه عرب بلوجر  فيه دروس فى استخدام البلوجر وحاجات زى كده
اتعرفت منه على بعض الاشخاص فى اغلبهم ليسوا مصريين 
منهم شخصيتين هحكلكم عليهم الاول هو عبد الرحمن الكيلانى صاحب مدونة بصمة قلم وعلى ما اعتقد ومن اللوجو اللى حطه فى المدونة هو مدون سورى
الصراحه ليه اسلوب فى الكتابة اكثر من رائع حتى وان اختلفت معه ,  اسلوبه شيق ومرح ومنطلق مش زى حالاتى كده 
والشخص الثانى هنرمز له بـ ( س ) صاحب مدونة برده هنرمز لها بـ ( ص ) 

وعلى فكره الرموز ده مش استخصار انى احط لينك عندى فى المدونة ولكن منعا للمشاكل وفتح باب من الجدل مره اخرى  مع العلم ان معظمهم لهم باع فى الانترنت و المدونات يفوقنى بمراحل
المهم يا سيدى عبد الرحمن الكيلانى ده اول مره اشوف مدونته كان فيها موضوع اسمه يشدك من اول لحظه 
اسمه مـمـنـوع دخـول النـسـاء !! 
انا دخلت اشوف ايه اللى ممنوع تدخله النساء ده وكان الموضوع بيحكى عن رجل بيبع شرايط كاست ,  وكتب على باب المحل ممنوع دخول النساء , اما الاخ عبد الرحمن فكتب مستنكرا كيف يبيع الغناء ويمنع دخول النساء مشبها الغناء ببريد الزنا والفجور والمجون 
ودخلت انا لاناقشه فى هذه التشبيهات المتعصبه والتى اجدها غير مناسبه ذلك ان الغناء كما قراءت فيه حلاله حلال وحرامه حرام فلا يجوز ان يكون الكلام على اطلاقة
وقدمت اسانيدى من الكتاب والسنه وقدم هو اسانيده ولكن رغم ذلك لم نصل الى نقطه اتفاق وتركت الموضوع بعد ان وجدت انه لا محاله للوصلل الى نتيجة 
هذا بالنسبه للاخ عبد الرحمن الكيلانى ام الاخ ( س ) فقد كتب فى مدونته (ص) عن الغناء بانه حرام وانه يجعلك تفكر فى اشياء حرام ويجعلك تحزن مع الكلمات التى تغنى فمالك انت ان تحزن مع المؤلف فهو يأخذ مالا وانت تأخذ حالات نفسيه سيئه 
وبرده دخلت لاناقشه بان ليس كل الغناء كئيب وحزين وبان ليس كل الغناء حرام ( نفس اللى عملته مع الاول وتقريبا بنفس الادله ) 
الا انه لم يقتنع بكلامى نهائيا حتى انه استنكر ان يكون احد يفكر بطريقتى 
المهم يا سيدى انا بقى ليه كتبت انى بحترم الاخ عبد الرحمن الكيلانى 
من مده كده دخلت اتفرج على الموضوعات اللى رديت عليها فى المدونات ممكن يكون حد وافقنى فى الراى او حد انتقدنى وبكده ادخل فى خناقه جديدة 
بس الغريب انى وجدت الاخ ( س ) حذف كل تعليقاتى نهائيا ولا اعرف السبب ولا لماذا حذفها 
هل يعتقد ان كلامى من الممكن ان يؤثر سلبا على من يسمون انفسهم ملتزمين ؟ 
الصراحه ترددت كثيرا فى انى اناقشه وذلك لانه اذا حذف تعليقاتى فهو لا يريد المزيد من النقاش وغير مستعد لسماع صوت غير نفسه ومن يوافقونه
المهم يا سيدى انا قلت لا مش هكلمة فى الموضوع ده يكفى انه حذف ردودى فهذا دليل على انى كنت اتحدث بادله فخشى ان تكون ادلتى صحيحه

وفكرت فى ان اكتب فقط عن شكرى للاخ عبد الرحمن الكيلانى الذى رغم دفاعه المستميت فى وجه نظره فى حرمة الغناء الا انه لم يفكر للحظه ان يحذف تعليقاتى واكتفى بان يرد عليها 
وان اليوم اكتب لاقول له شكرا على تقبلك للاخر وعدم رفضك لوجهات النظر المعارضه لك 
وليزيد الله من امثالك