"لا تلومني على كلامي الذي لم انهيه ولا كتابتي التي لم تنهيها"

زوجة الكاهن اللى مش مختفية ولا مخطوفة


حالة الاختفاء تهدد بإشعال أزمة بين المسلمين والأقباط

يا هلا يا هلا فاكرنى ؟
انا اللى كنت كتبت ان ممكن مرات الكاهن ((راعى كنيسة مارمرقس بدير مواس)) ممكن تكون مشيت بمزاجها ... راجع التدوينه اللى فاتت 
انا بقى كتبت ايه ساعتها 
كالعاده قعدتك اتفزلك واقول ما يمكن مشيت بمزاجها [ ممكن تكون مشيت بمزاجها ( مخنوقة يا جدع ) ]
بس طبعا تقول لمين هما لقوا ان المظاهرات بتجيب ناتيجة قالك يلا يا جدع نعمل مظاهره 
وقعدوا يقولوك وفاء قسطنطين جديده 
وشوية من نوعيه 
يا جمال قول للريس خطف بناتنا مش كويس 
طبعا مش هعلق على هما ليه مبيقولوش للريس على طول لازم الاخ جمال يكون واسطة ؟
المهم يا سيدى ايه اللى حصل ؟
مرات الكاهن كانت مخنوقه منه فراحت عند معارفها مع العلم انها اخدت اجازه قبل ما تمشى 
ولما لقوها ابتدوا بقى يشكروا الامن اللى كانوا بيتهموه بالتواطؤ وانه عارف مكانها وساكت وانها اتخطفت وتلميحات من اللى قلبك يحبها بس مش هنعلق عليها برده عشان احنا ناس عاقله 
يبقى بقى شوية تسالات مشروعه غصب عن عين اى حد 
- بالنسبة لينا احنا ممنوع علينا نعمل اى مظاهره لاى سبب فى اى جامع تحت اى ظرف ولو خالفت انت عارف ايه اللى ممكن يجرى لك 
مع العلم ان المسجد الازهر على سبيل المثال كان مكان  مظاهرات لا تنقطع ايام الاحتلال 
بس فى عصرنا الذهبى المنقط اللى بنعيشة .. مينفعش حتى تفتح بؤك وانت فى الحمام 
طيب بقى هما لما وقفوا وتجمهروا وعملوا مظاهره فى الكاتدرائية محدش كلمهم ليه ؟
- هما قالوا انها اتخطفت وطلعت هى اللى مشيت بمزاجها يبقى ايه بقى ؟.
محضر ازعاج للسلطات ؟
ولا السلطات مبتنزعجش من شكاوى الاخوى الاقباط 

- زوجها اجزم انها لا يمكن تكون زعلانه منه لان فى بينهم حب وتفاهم وكل الحاجات الحلوه دى... عشان كده قال مش ممكن تكون مشيت بمزاجها 
طيب يا سيدى الفاضل هل تعلم ما بالنفوس زوجتك مثل اى زوجة ممكن تكون واخده على خاطرها فى موضوع انت مش داريا بيه لان انت عارف الستات ممكن تزعل من اى كلمه 
مش بقى لو كنت شفت التدوينه بتاعتى اللى فاتت وسمعت كلامى ورحت دورت عليها كان الوضع بقى احسن ولا ايه ؟
يا اخى طيب ما تجربوا تدوروا عليها بدل ما انتم واقفين حاطين ايديكم على خدكم( من التدوينه السابقه )
 هنا بقى انا خلصت كلامى وهكتب بس كلمتين لاخواتى الاقباط واقسم بالله كلمه اخواتى من قلبى لان منهم بالفعل من هم مثل اخوتى الاشقاء واعتز بصداقتى لهم اكثر من اى شئ 
انسوا نظرية المؤامرة .... جربوا بس تنسوها 
لان احنا ولاد بلد واحده غصب عن عين اى حد وانسوا موضوع الاضطهاد لان اذا كنتم تشعرون ان المسلمون يضطهدوكم  فانا اقسم لكم ان المسلم الذى يضطهد مسيحى دينه ناقص لان ملزم بان يعاملكم باحترام كما امرنا الله ورسوله 
فاتمنى ان تعودا اخوه واتناسوا التظاهر من اجل اتفه الاسباب وان دعت الحاجه الى المظاهره فيجب ان تكون على حاجه ملحة لا يمكن حلها الا بالمظاهره ... مش واحده خرجت ولم تعد وفى الاخر كانت زعلانه من جوزها