تدوينة فى الكلوب


http://www.shorouknews.com/uploadedImages/abdel(1).jpg


كل شوية يلغولنا حاجة فى مصر او يغلوها او يقللوها او يمنعوها يعنى من الاخر عايزين الناس تهج وطبعا محافظ القاهره انا على اخرى من حضرتك لان بكل بساطه عملتلى كرسى فى الكلوب فى  تدوينة بقالى سنه بتمنى اكتبها ومستنى اللحظة المناسبة
اقولك ايه ربنا يسامحك...


طبعا انت ايها القارئ الغلبان مش فاهم انا بتكلم عن ايه
بس انا مش عايز اوضح عشان متتقهرش زى حالاتى
طيب نتكلم الاول محافظ القاهره ضرب لى تدوينه ايه
انا الصراحة كنت مستنى قبل رمضان باسبوع ولا حاجة عشان اكتب وافضفض واخنق حضرتك ايها القارئ السعيد ... او الحزين حسب ظروفك -  وانا مبحبش ادخل فى الى مليش فيه - بتدوينه عن رمضان فى حتتنا من ايام مكنت عيل صغير لحد ما بقيت عيل كبير
من ساعة ما كنا بنجمع الفلوس ونتنح على اهلينا لحد ما نطلع بالمعلوم عشان نروح نشترى لمض واطباق عشان نحطها فوق المض ونروح نقصقص ورق الكراريس بتاع المدرسة اللى مكتبناش فيه حاجة ونجيب شلل الخيط ونعمل الزينه الورق لحد ما ربنا كرمنا وبقينا نجيب الزينه البلاستيك ام ربع جنية المتر
ونبداء نعلقها فى الشارع
وصحيح ان فى الوقت الحالى فى جيل تانى استلم مننا مهمة تعمير الشوراع بالزينه الرمضانيه بس برده بنقف ونتفرج عليهم ونديهم النصيحه والارشادات عن طريق التليفون او الايميل على طريقة الحكومة الذكية و احياينا كنا بنعمل عليهم مشرفين
طبعا حضرتك كل ده ولا انت فاهم منى حاجة
طيب ذنبك على جنبك انا هقولك اللى حصل
السيد عبد العظيم وزير محافظ عاصمة المحروسة قاهرة المعز لدين الله الفاطمى بين قوسين القاهره  لقى انه يلغى زينة
رمضان واللى عايز يركب زينة يستصدر تصريح من المحافظة
وسلملنا بقى على الروتين والوقفه فى الطوابير وهات لنا امضاء الاستاذ عبد الرحمن من الدور التاسع وهات ورقه دمغة من ام عشرة قروش وتحلف لمين ان العشر قروش اتلغت وان ممكن تشترى دمغة بجنية ونص بس اخينا الروتيناوى ... ابدا من ام عشر قروش اقسم لك بالله بطلوها
طيب اقولك حاجة مش سر خالص
منيش معلق زينه فى رمضان السنه دى ارتحت يا سياده المحافظ ؟
ومستنين حضرتك بقى بشوية قرارات حكيمة من نوعيه
الغاء الكنافه
وتخفيف الضغط عن المسحراتى
ومنع السحور بعد الساعه اتناشر  و اتنين وعشرين دقيقه وسبعتاشر ثانيه
والغاء اغنيه وحوى يا وحوى واستبدلها باى حاجة لتامر حسنى
واعتقال اى فنوس ... ولا اقولك لا ده صينى خليه

ملحوظة :- محطتش صورة لزينة رمضان فى التدوينة عشان لسه بحاول استصدر الترخيص

تعليقات

المشاركات الشائعة من هذه المدونة

[1] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job

اكواد المهن في التأمينات الاجتماعية

[2] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job