سيادة رئيس ديوان المظالم " جود باى" -2

http://byamt.files.wordpress.com/2009/04/highway2.jpgبعد ان قدمت لك يا صاحب المقام الرفيع شكوتى الاولى والتى اعتقد انها لم تصل اليك لكثرة مشاكلك او عشان زحمة المواصلات - مش عارف بالظبط - قررت اقدم لك شكوى ثانية
وشكوتى الثانية مش بعيدة اوى عن الاولى ... يا سيادة رئيس الديوان بعد ان قررت انى ساذهب الى العمل بدون غسيل وش - عشان المية فيها طين - نزلت من البيت وانا لسة بردة سعيد وبغنى الحياة حلوة بس حضرتك وانا لسة فى اول كوبلية وقعت فى بلاعة مجارى مفتوحة
وجيت اشكى لك يا رئيس ديوان المظالم , ديوان السبل والطرقات


بيعاملونا حضرتك كما الحشرات
حضرتك طبعا الارض عندك حرير وبتشوف الشجر مزهر حتى لو فى الخريف والوان الدنيا وردية بس على ايد عظمتك اليمين جنب قصرك العظيم فى ناس متلطمين وفى الوحل غرقنين
ايووووه هما دول عظمتك
دول احنا
ساكتين
بنركب القطار عشان لقمة العيش وبندعى ربنا نكمل المشوار ونعيش (بس دى عظمتك مش مضمونة )
حتى الميكروباص من فساد ديوان السبل والطرقات وهندسة مقاولات اهل الثقة والقرايب والاحباب بقت تترقش فى بعضها زى البيض فوق دماغ مغنى درجة تلاتة فى تياترو كحيان
يا سيادة رئيس الديوان شعوب العالم بتصحى تدعى يكفيها شر الحروب والمجاعات والكوارث الطبيعية
واحنا بنصحى ندعى ربنا يكفينا شر الطريق والحوادث المريرة
وبندعى بالصلاح لسالم والدائرى والمحور وستة اكتوبر وجميع الطرق والميادين
سعادتك انا كنت ماشى فى حالى ومركز فى طريقى طوالى باصص يمينى وشمالى - زى ما كتلوج الحوادث بيقول - بس هى لحظة شرد فيها ذهنى واترحلت عنيا عن الطريق كنت فى بير غميء والريحة بعيد عن سعادتك قبر
عرفت بعد كدة انى وقعت فى بلاعة  مجارى
الشوارع بايظة عظمتك على الاخر دة مطب صناعى ودة مطب طبيعى ودة مطب عشان نخلص من الخلق الزيادة
وكل شارع فية بدل النقرة ميت نقرة وبدل الدحديرة الف دحديرة
والتكاتك عظمتك وده جمع توك توك
والتعريف شئ غريب يشبة الى حد ما الخنفساء ويعوى مثل البعير وينقلب مثل السلحفاء
ودة وسيلة مواصلات جديدة بس الغريب انها اكتر من العبيد
وبفضل مافيا الصين والمستورد الغير متين طبقت نظرية توك توك  لكل مواطن
وبقوا هما اصحاب الحق فى الطريق واحنا عالة عليهم وما بنسلمش من الزعيق
مع ان الخلايق عايزة بس شغلة لكل مواطن لقمة لكل مواطن زلطة لكل مواطن تيجى فى دامغة ويرتاح من السرقة فى العلن قبل الباطن
وكمان يا سيادة رئيس الديوان جئت اشكى لك اصحاب المحلات والفرشات احتلوا الشارع سعاتك وقواتنا مش بتاحرب.... محتاجين حرب تحرير جديدة لشورعنا المنهوبة
بفعل فاعل وعلى عينك يا تاجر هما بس كام لحلوح فى الايد و اهو كلة سبوبة
دة صاحب محل سيادتك يبلغ من المساحة اربعة امتار
احتل من الشارع ما يقرب من عشرة امتار
حاطت عرايس العرض فى وسط الشارع لما بقينا نمشى بنخبط فيهم - لا واية نعتذر - فكرنهم بنى ادمين
اشكى لسعتك اية ولا اية خلاص الكلام مبقاش لية لزوم اصلى ممكن افلسع دلوقتى وافضى مكانى لأحد التكاتك الموقرة
سلام عظمتك عشان داخل نفق دلوقتى بالميكروباص ومش عارف هنطلع منة ولا لا .... الفاتحة ... بسم الله الرحمن الرحيم
اه.....امانة عظمتك لو مخرجتش من النفق افتكروا  قَول امير المؤمنين
عمر رضي الله عنه "لو تعثرت بغلة في العراق سأسال عنها يوم القيامة لما لم امهد لها الطريق "
بلاش تمهد الطريق للبغال سعاتك خليهم بس يمهدوها للعباد لحسن الحالة صفر زى بتاع المنديال
ومتنساش تدعيلى اخرج من النفق
سلام...!!

wwadع mrع

تعليقات

المشاركات الشائعة من هذه المدونة

[1] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job

اكواد المهن في التأمينات الاجتماعية

[2] اسئلة مقابلات العمل لوظائف الموارد البشرية وشئون العاملين Interview Questions for HR and Personnel job